دونیا بیلدی کی بیز تیراختورا عاشیقوخ

تیراختورون بیرینجی آسیا اویونو گونو دور! تبریزه گئده بیلمه دیم و تکجه ساعات دؤرد یاریمی گؤزلورم ایشدن قاچام. دئییلن خبرلره گؤره، الجزیره اویونچولاری نین قیمتلری، تیراختور اویونچولاری نین نئچه قاتی دیر ( چند برابر). آما بیزیم تاماشاچی سایی میز دا، اونلارین یوز قاتی دیر! هر حالدا بیز اؤزوموز آسیا ایسته میشیک، و اؤز تیراختوروموزا گووه نمه لی ییک؛ و البته کسینلیکله، آسیا یاریشلاریندا داورلیک چتین لیگی ، ایراندان آز اولاجاق! استرس یئرسیز دیر و هیجانلی اویون گؤزله ییریک. تقویمین 8 اسفند، گونو یارپاغی نین دالیسیندا “ای گیبون” آدلی بیر آدامین سؤزو یازیلیب:

بادها و امواج ، همیشه موافق ناخدای توانا جریان می بابند.
یئللر و دالغالا، باشاریلی گمیچی ایله مووافیق اولارلار.

تونی اولیوئیرا دا بیزیم گمی چی اولسا، یوز مین تاماشاچی نین آلقیشی، گوجلو یئللر و دالغالار اولاجاقلار. و بونو فجر سپاسی یاریشیندا گؤرموشدوک. اویونچولار بیر آز اؤزلریندن چیخدیلار، آنجاق تاماشاچیلار، تونی نین آلقیشلاییب، تیراختورو حاشیه باتلاغینا گیرمکدن چیخارتدیلار.

اویون باشلانیب و تیراختورچولار سونامی سی آسیا نین باتی سیندان دوغوسونا چاپا-چاپا گئتمه یی باشلاییر. عربی آدلانان فوتبولدان دا خبر یوخ؛ حؤرمت ائدن حریف قارشی سیندا، عربلر ده دوزگون اویناییرلار و بیلیبلر سهند ایستادیومو، اویناماق یئری دیر و یاخشی اویناییرلار؛ و البته 40 دقیقه یاخین دا تیراختوردان قاباغا دوشه بیلردیلر. آما ابراهیمی نین غئیرت ایله توپدان واز گئچمه مه یی، و اکرامی نین ذکاسی، و سیدصالحی نین تجروبه سی ال اله وئریب، باعیث اولدولار، تیراختور آسیا دا بیرینجی گولی ووروب یورشونو باشلاسین. و ادامه ده الجزیره اویونچولاری قاباغا چکیلمکلری ، تیراختورون یولونو دا آرتیق آچدی؛ تیراختورون باشدان آیاغا حمله ائتمه سی، باعیث اولدو بیر قول دا یئیه ک؛ آما ، بو دا بیر دلیل اولار مودافیعه چیلر، گلن اویونلاردا داها آرتیق دیققت ائتسینلر. آما سانکی بو گل یئمک قیسمت ایمیش کی، الجزیره داها آرتیق قاباغا گلسین، وآزربایجان دا، بیر آزربایجانلی دا، مسعود ابراهیم زاده گل وورسون!

و بئله، تیراختورون بیرینجی یاریشیندا، آسیا آزربایجان کؤلگه سی آلتیندا قالدی.