شعری در رثای زلزله آذربایجان
قهر ائديب پير و جوانه اهرين زلزله سي
عالمي گتدي فغانه اهرين زلزله سي
ورزقان شهرينی ييخدي ؛ هريسی ائتدي وئران
يئنه قاتدي قاني قانه اهرين زلزله سي
اولدوروب كؤرپه ني ، آغ ساققالی ؛ آغ بیرچگیده
باخمادی خانه ؛ چوبانه اهرين زلزله سي
تو كدي يارپاق كيمي اينسانلاري ظولمیله يئره
اوخشادی باد خزانه اهرين زلزله سي
مردمين كونلوني يانديردي ؛ یامان ائتدي كباب
اود ويران واختدا تيكانه اهرين زلزله سي
تازه دامادیله ، تازه گليني اؤلدوردي
قوجاني سالدي زیانه اهرين زلزله سي
باخمادي فقره ، اوروج آغزا ، ساري رخساره
شب قدره ، رمضانه ، اهرين زلزله سي
كيمسه سيز خلقین ائوين ييخدی ؛ داغیتدی تیفاقین
ویردی اود خُرد و کلانه اهرين زلزله سي
پايه سيز ائولري ديوانه فلك ويردي يئره
گوجونو قويدو قاپانه اهرين زلزله سي
قيزلارين ياخشي تخيّوللاري ، رؤيالاريني
دوندریب گؤر نه يامانه اهرين زلزله سي !!
من كي تصوير ائده بيلمم بو يامان فاجعه ني
وصفی گلمز که بيانه اهرين زلزله سي
اردبيل شهريني ؛ گيلاني تكان وئردي تمام
چاتدي قزوين ؛ همدانه اهرين زلزله سي
يئنه بو زلزله بش گونده چيخار يادلاردان
کاش مسئوللار اويانه ؛ اهرين زلزله سي !!!!!!
منبع://pesteyekhandan.blogfa.com/
برچسب‌ها: مقابله با زلزله, زلزله, ایمن سازی, تلفات زلزله