آي ائللر
بير ايل ايشيق گؤردوك گولدو يازيميز
باغدا آچدي چيچهييميز آي ائللر
ييغناق قوردو دستان آچدي سازيميز
ياسدان چيخدي اورهييميز آي ائللر
پاييز گلدي اسدي قارا سازاقلار
يارپاقلارا حسرت قالدي بوداقلار
يئنه ده بوش قالدي ياشيل قوجاقار
تالان اولدو امهييميز آي ائللر
شاختا ياغدي باغدا گوللر تؤكولدو
يئنه داغلار اوسته دومان چؤكولدو
قيزيل دامين كرپيجلري سؤكولدو
چيركين اولدو گؤيچهييميز آي ائللر
قارا گونلر اولدو يوردون همدمي
درديميز اود توتدو ياخدي عالمي
تورپاغيميز اولدو يييهسيز زمي
سوسوز قالدي ديلهييميز آي ائللر
ارلر ظاليم قولاغيني بورمادي
قان ايچنه دار آغاجي قورمادي
«بير مرد اوغول بيزه هاوار دورمادي»
ساتدي بيزي كؤمهييميز آي ائللر
***
ايسينمهيه هله كؤز وار اوجاقدا
دورو سولار گؤزه دَيير بولاقدا
(سيّد) دئير بيزيم ياشيل تورپاقدا
گولهجكدير چيچهييميز آي ائللر
شعر از استاد میر حسینقلی ریاحی فر